Premios Turismo Sostible - Turismo Rias Baixas

A Deputación de Pontevedra, a través do Servizo de Turismo Rías Baixas, está apostando decididamente pola sostibilidade turística. O destino debe impulsar modelos de crecemento sostibles e inclusivos aproveitando a revolución dixital (acelerada pola pandemia) e a consolidación dunha tendencia na demanda turística que busca consumos responsables, singulares e auténticos. Para conseguilo, vaise impulsar un programa de concienciación que permita chegar ao maior número posible de entidades do sector privado e do público, de tal maneira que entre todo o ecosistema turístico da provincia se constrúa un destino sostible aliñado coa Axenda 2030.

Enmárcase no Plan estratéxico de Turismo Rías Baixas 2021-2023, concretamente para desenvolver a acción operativa 5, da ficha núm. 5, do eixe 1 “Promoción e comunicación”, no que textualmente se di: “05 Convocatoria e entrega de premios a empresas e entidades turísticas pola posta en marcha de iniciativas sostibles e experiencias baseadas en valores locais. Os ditos premios entregaranse na Gala Anual de Turismo Rías Baixas”.

Sen dúbida, o turismo é un dos motores de desenvolvemento de maior relevancia ao ser un sector que presenta uns salientables índices de crecemento, tanto en relación co número de turistas coma pola súa contribución ao produto interior bruto de moitos países. Non obstante, este crecemento atópase nunha encrucillada; pódese levar a cabo aplicando criterios de sostibilidade ou, polo contrario, pode contribuír a facer do noso planeta un lugar cada vez máis insostible. A implicación do sector turístico na consecución dos 17 Obxectivos de Desenvolvemento Sostible de Nacións Unidas pode desempeñar un importante papel para implicar as novas xeracións nun escenario de sostibilidade que esixe a participación colectiva.

Con esta idea nacen os Premios Turismo Sostible Provincia de Pontevedra, baixo un enfoque de continuidade no tempo e cun obxectivo claro de incorporarse a outras accións e iniciativas que se aliñen coa meta perseguida por Turismo Rías Baixas, que non é outra que avanzar na implementación de medidas concretas que melloren a oferta turística e a fagan máis competitiva, pero sempre desde un enfoque de sostibilidade.

Estes premios terán carácter honorífico, carecerán de dotación económica e concederanse mediante o procedemento de concorrencia competitiva, de acordo co previsto na Lei 38/2003, de 17 de novembro, xeral de subvencións (LXS), e no seu regulamento, aprobado polo Real decreto 887/2006, de 21 de xullo.

Desde o punto de vista competencial, na Lei 7/2011, de 27 de outubro, de turismo de Galicia, saliéntase a importancia de acadar e manter un sector turístico competitivo, de calidade e accesible, así como a transcendencia de implantar medidas de promoción e fomento mediante a posta en valor dos recursos singulares de Galicia como medio para desestacionalizar a demanda; así mesmo, nela se prevé o reforzo destas medidas a través da concesión de subvencións e axudas para aqueles colectivos que aposten pola modernización e pola mellora das actividades turísticas de Galicia.
No ámbito provincial, no artigo 36.1 d) da Lei 7/1985, de 2 de abril, reguladora das bases do réxime local, establécese como competencia propia das deputacións provinciais a cooperación no fomento do desenvolvemento económico e social e na planificación no territorio provincial.

Do mesmo xeito, no artigo 109.1.d) da Lei 5/1997, de 22 de xullo, de Administración local de Galicia, determínanse como competencias propias das deputacións o fomento e a administración dos intereses peculiares da provincia, e no seu artigo 118.d), a organización de concursos e exposicións e de calquera outra actividade cuxa finalidade sexa o fomento en materia de cultura, educación e deporte.

Segundo o exposto, a Deputación de Pontevedra establece as bases reguladoras da convocatoria  pola que se rexen as solicitudes de participación na primeira convocatoria dos Premios Turismo Sostible Provincia de Pontevedra, ao abeiro do establecido na LXS, na Lei 39/2015, de 1 de outubro, do procedemento administrativo común das administracións públicas (LPACAP), na Ordenanza reguladora de subvencións da Deputación de Pontevedra e na demais normativa aplicable, de acordo coas seguintes: