Celebra Fin de Ano nas Rías Baixas o 30 de decembro
Noitevella en Cambados
Fai apenas tres meses Cambados, na ría de Arousa, celebraba ao grande ser Cidade Europea do Viño 2017. O evento incluía un festival de música e sumábase á xa popular Festa do Albariño, celebrada do 2 ao 6 de agosto, alcanzando nada menos que a súa edición número 65 como unha das festas enogastronómicas máis lonxevas do panorama español. Non só aumentou en asistencia, senón que bateu récords de cataviños con máis de 35.000 copas servidas ao finalizar a festa.
Para coroar a devandita distinción, organizouse un novo evento para despedir este gran ano e o seu produto estrela, o albariño, cuxa colleita actual foi nas Rías Baixas a segunda mellor da historia, rozando os 40 millóns de quilos de uva colleitada, e onde o prezado viño foi eloxiado ata por sommeliers que escriben para The New York Times.
O día, no canto do 31, adiantouse ao sábado 30, e a hora ás doce do mediodía na torre de San Sadurniño. Os organizadores animan a toda a cidadanía a asistir ao evento onde se repartirán as uvas e como non podía ser doutra forma brindarase con viño local. Neste caso optarase polos espumosos con Denominación de Orixe Rías Baixas, menos coñecidos pero que comezan a buscar o seu sitio nas celebracións e a promocionarse como o fixera Salvaterra do Miño a comezos de decembro.
O evento contará coa presenza do humorista Gogue, natural da comarca do Salnés, e o seu personaxe estrela Floreano, mentres que outro dos personaxes, Monchiña, será a encargada de dar as badaladas. Desde o Concello esperan que sexa un éxito e animan a veciñas e veciños a asistir.
Festas pre Fin de Ano do Porriño e Mos
Cambados non será o único municipio que se adiante ás badaladas de medianoite. Ademais da popular Festa das Uvas de Vilagarcía de Arousa programada para o mediodía do día 31 e que leva realizando 19 anos, O Porriño tamén se animou a esta moda de adiantar a Noitevella.
Do mesmo xeito que en Cambados, a convocatoria realizouse para o sábado 30 pero neste caso ás 23 horas da noite. Trátase dunha festa pre Fin de Ano que se celebrará na praza Arquitecto Antonio Palacios e na Carpa do Roxy. Para acceder ao evento hai que presentar o código QR que se pode localizar na súa páxina de Facebook .
Tamén Mos quixo celebrar unha festa pre Fin de Ano o día 30. O lugar elixido foi o pazo de Mos e animan a acudir a partir das 22 horas da noite. Contará con badaladas, cotillón e uvas, das que xa se prepararon 1.500 racións para a ocasión. A pesar de ser a súa primeira edición, desde o Concello tamén desexan que sexa un éxito entre as e os veciños e queren darlle continuidade nos próximos anos.
Macrofesta na Noitevella de Vigo
Praza de América é un lugar de encontro para celebrar en compañía o Fin de Ano na cidade de Vigo. Entre as e os asistentes repartiranse racións de uvas para a conta atrás que ofrece o reloxo do centro escolar Santa Irene. O novo ano será recibido con fogos artificiais e música programada ata as cinco da mañá.
