Comezan as rutas regulares ás illas Cíes
Un dos maiores atractivos das Rías Baixas e tamén de toda Galicia son as illas Cíes. Pertencen ao arquipélago das Illas Atlánticas, que en 2002 foron declaradas Parque Nacional. Hoxe centos de persoas achéganse ata a costa galega só para poder gozar dun ou varios días nelas.
Aínda que durante o outono e a primavera hai certas viaxes en datas sinaladas como pontes vacacionais e Semana Santa, é agora, o 1 de xuño, e ata o 30 de setembro cando comezan as viaxes regulares de maneira diaria. O primeiro que as e os futuros visitantes deben saber é que desde 2018 requírese dunha autorización para poder acceder ás illas Cíes. Este permiso, gratuíto, pódese obter cunha marxe de 45 días de antelación, en liña, en apenas cinco minutos, enchendo os nosos datos; é recomendable a súa impresión.
O seguinte dato a ter en conta é que ter a autorización non asegura nin reserva ningún billete de embarcación, polo que unha vez obtido o permiso o máis recomendable é realizar a compra do billete desde o porto no que vaiamos embarcar. As navieiras autorizadas para iso son Mar de Ons, Cruceiros Rías Baixas e Piratas de Navia.
Os portos principais desde onde se poderá embarcar diariamente son os de Vigo e Cangas. De maneira menos habitual existen saídas desde Baiona. De non haber cambios, o custo da viaxe, ida e volta, é de 16 €, gratuíto para menores de 12 anos. A partir do 15 de xullo e ata o 31 de agosto será de 18,5 € e o importe de menores de 3 a 12 anos será de 6 €. Os horarios habituais dependen do porto e da navieira e incrementarán a súa frecuencia nos meses de xullo e agosto.
As persoas que desexen pernoitar pódeno facer no propio cámping do parque. Recoméndase ter unha reserva previa. As e os que desexen acampar teñen a posibilidade de alugar unha tenda de campaña no propio recinto. O mesmo cámping ten a súa propia cafetería.
As Illas Atlánticas conforman unha Zona de Especial Protección de Aves (ZEPA) incluída no catálogo da Rede Natura 2000
Unha vez en Cíes, a actividade máis popular é lanzarse a coñecer a illa por algún dos seus sendeiros. Existen catro rutas de diferente dificultade e hai que ter en conta que unha xornada non dá para percorrer a illa enteira. Estes sendeiros son os de “Monte Faro”, “Faro da Porta”, “Alto do Príncipe” e “Monteagudo”. Os seus miradoiros ofrecen as vistas máis envexables da ría e desde moitos dos seus recunchos poderemos ademais gozar do turismo ornitolóxico. Non en balde, as Illas Atlánticas conforman unha Zona de Especial Protección de Aves (ZEPA) incluída no catálogo da Rede Natura 2000. Por iso é bastante importante coidar e respectar toda a súa contorna natural.
Outra importante recomendación tanto para camiñantes como para o resto de visitantes é utilizar un calzado apropiado e crema solar incluso se fai vento ou un día nubrado. E para quen prefira gozar da praia, Rodas é a principal de toda a illa. É un areal de auga cristalina declarado polo diario The Guardian como a praia máis bonita do mundo. Ademais, entre outras calas, existe un espazo para nudistas.
Volvendo aos permisos, outras actividades como o mergullo ou o fondeo nesta contorna requiren dunha autorización previa.
