De castelo a fortaleza: tras as pegadas de Pedro Madruga
Descubrir o patrimonio fortificado de Pontevedra a través da vida dun dos seus personaxes máis famosos, Pedro Álvarez de Sotomayor, máis coñecido como Pedro Madruga, é o obxectivo da ruta bautizada polo seu nome, unha nova alternativa de lecer para descubrir a incrible paisaxe de castelos, fortalezas e torres da provincia de Pontevedra.
Os castelos de Soutomaior, Salvaterra de Miño, Monte Boi e Sobroso, a cidade de Vigo e Tui, e as torres de Fornelos, A Lanzada e San Sadurniño conforman esta ruta turística pola provincia de Pontevedra, unha iniciativa de posta en valor enmarcada na campaña “Somos historias”.
A ruta Pedro Madruga pretende, en palabras da presidenta da Deputación de Pontevedra, Carmela Silva, “promocionar a riqueza do patrimonio fortificado da nosa provincia”, para o que se crea un percorrido que “será para visitar todo o ano”. Co fin de darlle difusión, a responsable da institución, informou que se incluirá esta ruta de turismo cultural en todas as campañas de promoción da Deputación e distribuiranse folletos explicativos nas oficinas de Turismo Rías Baixas.
Pedro Madruga, unha figura controvertida
Pedro Álvarez de Sotomayor, coñecido como Pedro Madruga segundo algúns polas horas do día en que executaba aos seus inimigos e por outros polo seu gusto para cabalgar polas mañás, foi o fillo bastardo de Fernán Yáñez de Sotomayor, herdando o castelo e o nome da familia ao morrer o seu pai sen descendencia. Foi notable figura protagonista polo seu fervor na loita contra os Irmandiños e na sucesión no reino de Castela tras a morte de Enrique IV, que o levaría a enfrontarse aos Reis Católicos e ao bispado.
O periplo vital do que algúns, debido á súa misteriosa morte, identifican con Cristóbal Colón, vincúlao ao castelo de Soutomaior, onde viviu, pero tamén á reconstrución da torre de Fornelos, en Crecente, e a toma pola forza do castelo de Sobroso. Tamén foi vizconde de Tui e a súa intensa loita contra a rebelión social do século XV sitúao tamén nas torres da Lanzada e San Sadurniño, en Cambados. É por iso que a ruta Pedro Madruga centrarase nestes lugares onde o nobre galego viviu intensamente e protagonizou unha vida de película.
Experiencia 'Ruta Pedro Madruga: Unha viaxe ás Fortificacións das Rías Baixas'
