Expertos en turismo dixital debaten no castelo de Soutomaior
![Encuentro de turismo digital en el Castillo de Soutomaior, Pontevedra](http://turismoriasbaixas.com/documents/11015/367795/inaguracion-castillo-soutomaior-2.jpg/2eb51765-1ef3-4479-8aec-c81867a76113?t=1526469047000)
O castelo de Soutomaior acollerá o próximo 24 de outubro a primeira Xornada TurisTIC de Turismo Dixital, un evento organizado pola Deputación de Pontevedra no que, a través de varias charlas e mesas redondas, destacados expertos e axentes do sector en España debaterán sobre a transformación no modelo turístico, casos de éxito, e cambio de hábitos de consumo coas novas Tecnoloxías da Comunicación e Comunicación (TIC).
“Contaremos con algúns dos relatores máis relevantes de España”, afirmou esta mañá a presidenta da Deputación, Carmela Silva, ao anunciar a celebración desta xornada, que leva por título “Impacto das novas tecnoloxías no sector turístico”.
O prazo de inscrición está aberto a través de SmartPeme, servizo que abandera o proxecto TurisTIC, un punto de apoio á modernización do sector turístico creado o pasado mes de maio. O límite de prazas para asistir ao evento no castelo de Soutomaior será dun centenar e cubriranse por orde de entrega das solicitudes.
![Nuevas tecnologías aplicadas al turismo](http://turismoriasbaixas.com/documents/11015/677817/smartphone-telefono-movil.jpg/66862a60-21ab-403f-a5b7-1594557058d2?t=1536139645000)
O evento será inaugurado polo presidente da Sociedade Estatal para a Xestión da Innovación e as Tecnoloxías Turísticas (Segitur), Enrique Martínez Marín, e a primeira charla virará ao redor de “A innovación como motor do cambio no sector turístico”. O relator será Raúl Jiménez Algobia, fundador e CEO do coñecido portal de viaxes MiNube.
O director rexional de Paradores para a Zona Norte, José Ignacio Bosh, moderará a mesa redonda “Mellora da experiencia do visitante e fidelización de turistas ”, na que participarán Víctor Longo (Partee), Chiú Longuina (Pumpún Dixital) e Xoel Vázquez (Xoia Software Development”.
O “Impacto das TIC no sector turístico” será analizado por Antonio Rodríguez, presidente do Clúster TIC Galicia; Mar Rodríguez (Teetravel) e Cristina Collazo (Volta Montana). Moderará a presidenta de Empresarias de Galicia, Susana Pérez Igrexas.
Outra das mesas versará sobre a “Evolución da comunicación turística”, e encargarase de dirixir o debate Alberto Rivas, bloguero de Alvientoo . Nesta charla participarán tamén Leticia Pérez (Galicia TB), Alberto Traversa (La Alacena Roja) e Carmen Delia García (Escapalandia).
Os primeiros Premios ao Talento Turístico da Provincia de Pontevedra serán entregados ao termo e xa está aberto o prazo para as empresas que queiran inscribirse
Ademais das conferencias e mesas redondas, durante a I Xornada TurisTIC farase entrega dos primeiros premios ao Talento Turístico da provincia de Pontevedra “co obxectivo de recoñecer o labor desenvolvido a favor do turismo”, asegurou Silva. Os premios contan con cinco modalidades (Talento Turístico sustentable, Talento Turístico innovador, Talento Turístico gastronómico, Talento Turístico experiencial e Talento Turístico TIC) e desde hoxe e ata o 8 de outubro as empresas interesadas en optar a algunha das modalidades poderán facelo a través desta ligazón.
![Rueda de Prensa sobre turismo de la Presidenta de la Diputación de Pontevedra](http://turismoriasbaixas.com/documents/11015/677817/rueda-prensa-turismo-presidenta-diputacion-pontevedrapg.jpg/5367fca5-003c-4f38-9ec3-ec5b2573e8d0?t=1537526344000)
A Deputación, na Rede Española de Cidades Intelixentes
A presidenta da Deputación de Pontevedra tamén informou da reunión mantida o xoves na Secretaría do Estado de Turismo para o lanzamento dunha nova rede estatal de destinos turísticos. Durante o encontro, no que se recoñeceu o papel do Goberno provincial na modernización tecnolóxica do sector turístico de Pontevedra, participaron “moi poucas deputacións provinciais e entidades locais de España escollidas polo Goberno de España como promotoras da nova Rede Estatal de Destinos Turísticos Intelixentes”, explicou Carmela Silva.
Segundo adiantou a presidenta, a nova rede estatal operará como un órgano funcional e operativo a través do que se vai a mellorar a experiencia do turismo a través da innovación e sustentabilidade. Tamén desde a rede vai asesorar sobre calidade, solucións tecnolóxicas e capacitación dixital; e ofertaranse mellores experiencias para as e os visitantes.