Gastronomía, música e industria, os principais ingredientes do Vigo SeaFest
O Vigo SeaFest, que combina gastronomía, música e industria, vén da man da Cooperativa de Armadores de Pesca do Porto de Vigo, ARVI e conta coa colaboración, entre outras entidades, da Deputación de Pontevedra. Todo iso, nun espazo de máis de 23.000 metros cadrados na zona do Náutico de Vigo.
A cociña de autor, a gran protagonista do evento, céntrase en produtos que proveñen do mar, e conta coa presenza dun total de 18 chefs galegos. A programación inclúe todo tipo de actividades, como showcookings, concertos e espectáculos, obradoiros e actividades deportivas para toda a familia.
Ademais da gastronomía e a música, tamén hai espazo para as empresas da industria pesqueira, as relacionadas e a patronal das conserveiras (Anfaco). Todas elas dispoñerán dunha zona de exposición onde poderán darse a coñecer e promocionar os seus produtos.
Cociña de autor, especialidades e showcookings
A cociña de autor vén representada por: Gerson Iglesias(Adegas das Caldas), Carlos Grobas (Casa Rei), Fernando Joaquim de Sousa (Hiroki Sushi Bar), Elena Garmendia e Rafael Pérez (La Carpintería), Anabel García-Barroso (La Bastarda), Juan Carlos Perret (Kero Cociña Peruana), Neil Rodríguez (La Central Gastro), Sergio Vázquez (Pintxoteca Mar), Jesús Méndez (La Trastienda del Cuatro), Juanjo Figueroa (Lume de Carozo), Jimena Mejide e Pablo Rodríguez (María Manuela), Jonathan Mota Martínez (Mijo Minibar), Victor Fernández (Morro Fino), Adrián Albino (Niño Corvo), Celia Cabrera (O Croque), Beni Couso (Patouro), Andrés Médeci (Puro Sushi) e Carlos Rodal (The Othilio Bar).
Todos eles utilizan nas súas elaboracións algunhas das principais especies que chegan ao Porto de Vigo, desde o lagostino, o xurelo, o fletán negro, o peixe espada, o bacallau ou a raia, entre outros.
Por outra banda algúns restaurantes presentarán algunhas das súas especialidades, como o cogombro de mar en escabeche de kumquat (El Juliana), a octopus garden burguer (La Contenta), o polbo estilo “a feira ” con pan (Don Pepe Cátering) ou as ameixas ao vapor (Momo 46 Cátering). Ademais esta edición do Vigo Sea Fest contará coa presenza de nove foodtrucks: Kero Cocina Peruana, ANFACO, Al Fresco by Mijo Minibar, El Juliana, O Porquiño, Croketas D, Frutas Nieves, Panadería Iglesias e Lazal.
No escenario ARVI-Julio Verne terá lugar o venres unha sesión do Certame Galego do Campionato Nacional de Tiraje Estrella Galicia. De venres a domingo realizaranse diversos showcookings, catas e demostracións dalgúns establecementos como: Taberna La Bastarda, Barrabasada, Kero Cocina Peruana, María Manuela, Niño Corvo, Puro Shusi, Hiroki Sushi Bar, The Othilio Bar, Lume de Carozo. Tamén estarán presentes produtos de Pereira ou ANFACO.
Catro días de música
Nesta edición do Vigo Sea Fest terá lugar por primeira vez o I Certame Vigo Seafest Music o 5 de xullo. Esa mesma xornada saltará ao escenario Gigi McFarlane (17:30 e 20:30). Os días 6, 7 e 8 de xullo chegarán os pratos fortes do cartel, cunha proposta musical moi variada que presenta estilos moi diversos, entre eles o pop, o rock ou o soul.
O venres, a primeira quenda será para Maureen Choi Quartet (12:30 e 17:30). Ese mesmo día, os concertos nocturnos estarán a cargo de Morgan (21:30) e Elefantes (23:15). O sábado durante o día actuará Mel Semé (12:30 e 17:30) e os concertos de noite estarán protagonizados por Anaut (21:30) e Arizona Baby (23:15). O domingo, e último día, Bakin Blues Band (12:30 e 17:30) amenizará a velada diúrna, mentres que Patricia Moon (21:30) e Aurora and The Betrayers (23:15), serán os grupos encargados do peche a catro días de música.
Vigo, arte na rúa
A cidade olívica conta cun gran número de murais de arte urbana nas súas rúas seguindo o ronsel de grandes cidades como Lisboa ou Barcelona. Un museo ao aire libre que partiu como unha iniciativa para mellorar a estética dalgúns edificios e outros elementos e que finalmente se converteu nunha verdadeira ruta de arte urbana indispensable en calquera visita a Vigo.
