Historia, camelias e xogos de detectives no castelo de Soutomaior
O castelo de Soutomaior revive na actualidade a súa época dourada. Esta magnífica xoia do patrimonio fortificado da provincia de Pontevedra, que forma parte desde o mes de novembro do Club de Produto Turístico de Grandes Castelos e Palacios de España, suma unha gran cantidade de atractivos que fan da visita unha experiencia única.
Decenas de miles de persoas comprobárono desde a reapertura ao público do recinto en maio co novo museo , e o pasado nadal a fortaleza demostrou o seu potencial con máis de 700 visitas, unha gran parte delas en familia, xa que é unha actividade fantástica para gozar coas e os pequenos da casa.
As e os amantes da arquitectura gozarán ao grande deste marabilloso conxunto arquitectónico, metade fortaleza medieval, metade palacio neogótico do século XIX, que está formado por dúas torres unidas por un edificio habitable e un patio de armas, rodeados por unha dobre muralla. Unha ponte levadiza permitiranos penetrarnos nesta fortaleza, un recinto ideal para vivir unha aventura histórica entre os seus muros.
O museo que alberga ten moito que ver en que este castelo converteuse no centro de todas as miradas. Trátase dun magnifico espazo onde os segredos deste lugar serán revelados a aquela persoa que o visite. Situado nunha fermosa contorna natural recoñecida como Xardín de Excelencia Internacional en camelia, convídanos a gozar dun agradable paseo en calquera época do ano. O castelo forma parte da Ruta desta flor nas Rías Baixas , e durante o inverno os seus impresionantes exemplares viven o seu máximo esplendor.
Na actualidade, ademais, a fortaleza acolle unha exposición sobre “A Moda en Detalles. Indumentaria e Complementos (1870-1925)” , que mostra como vestían as mulleres burguesas de finais do século XIX e principios do XX na provincia de Pontevedra.
Descobre os segredos mellor gardados do castelo
O castelo de Soutomaior contén un espazo museístico dividido en dez salas que permiten á e ao visitante percorrer a súa historia e coñecer aos personaxes vinculados a esta xoia do patrimonio da provincia de Pontevedra. Esta exposición permanente utiliza as técnicas máis vangardistas, con sete audiovisuais, recreacións en 3d, un videomapping e varias caixas máxicas que causan sensación entre o público infantil, o que converte a actividade nun plan ideal para gozar en familia.
Para facer máis divertida a visita ponse á disposición do público unha guía infantil. As e os pequenos poñen a proba a súa habilidade para descubrir as reviravoltas do castelo mediante enigmas, sopas de letras, sete erros, secuencias incompletas e outros divertidos xogos . Ás familias que resolvan os xogos da guía entrégaselles un diploma selado que lles recoñece como “Detectives do castelo”. O material, dirixido a nenas e nenos de máis de seis anos de idade, está dispoñible en galego, castelán e inglés.
Cando o sol brilla no castelo
Cando o bo tempo acompaña, a marabillosa contorna natural que rodea a esta fortaleza das Rías Baixas convida a percorrer e descubrir os seus fermosos xardíns para coñecela en profundidade. Este paraíso botánico, considerado o máis importante de Galicia, está catalogado como Xardín de Excelencia Internacional en camelia.
Tres rutas facilitan o percorrido por este fermoso espazo natural de máis de 20 hectáreas. Convertidos en sendas, estes itinerarios discorren polo seu xardín de camelias, polos viñedos e polo bosque respectivamente . O xardín ofrece a súa mellor cara durante a estación invernal xa que esta bela flor das Rías Baixas, orixinaria de Oriente, florece nesta época e produce toda unha explosión de cor ao longo desta senda.
Así era a moda burguesa feminina da provincia de Pontevedra
Actualmente o castelo alberga a exposición “A Moda en Detalles. Indumentaria e Complementos (1870-1925)”. A mostra, formada integramente con pezas dos fondos do Museo de Pontevedra, exhibe máis de 200 pezas que nos achegan á moda feminina da burguesía na provincia de Pontevedra de finais do século XIX e principios do século XX.
