As mellores festas enolóxicas en Rías Baixas
Este fin de semana terán lugar as Xornadas de Portas Abertas da Ruta do Viño Rías Baixas. Un encontro que chega a súa sétima edición e que reflicte o bo momento no que se sitúa a Denominación de Orixe Rías Baixas. Nos últimos anos as exportacións aumentaron exponencialmente, 2017 foi a segunda mellor colleita da última década e o seu produto estrela, o viño Albariño, foi laureado por magazines especializados como Wine Folly que colabora para The New York Times.
Ademais das actividades preparadas para esta semana, os festexos ao redor dos viños e a enogastronomía galega teñen catro citas imprescindibles nos próximos meses na provincia de Pontevedra:
Feira do Viño do Rosal
É a primeira en suceder das grandes citas enolóxicas da provincia e cuxa celebración adoita caer a mediados de xullo.
Por colleita, esta subzona da Denominación de Orixe é a terceira e a súa localización preto da fronteira permite que moitas das persoas visitantes sexan lusas.
Festa do Albariño de Cambados
É a maior festa ao redor do Albariño na provincia. Lonxe de ser unha celebración máis, trátase dunha Festa de Interese Turístico Nacional que durante varios días reúne a miles de persoas para saborear este caldo galego. Non en balde, Cambados ostentou o título de Cidade Europea do Viño durante todo 2017. En 2018 está programada desde o mércores 1 ata o domingo 5 de agosto.
Aproveitando a ocasión, unha suxestión é achegarse ao Museo do Viño da cidade, o primeiro nesta temática na comunidade galega e un dos primeiros a nivel nacional.
A Festa do Viño do Condado do Tea é a segunda celebración gastronómica máis lonxeva de toda Galicia
Festa do Viño do Condado do Tea de Salvaterra de Miño
Salvaterra de Miño é a capital da subzona Condado do Tea, segunda na produción de uva da Denominación de Orixe, e a feira alzase como o maior encontro para degustar a elaboración anual das súas adegas. Trátase dun festexo que goza da particularidade de ser a segunda festa gastronómica máis lonxeva de toda Galicia. En 2018 alcanza a súa 59 edición e o encontro adoita realizarse na fortaleza da vila.
Ademais desta celebración, desde fai cinco tempadas, a cidade acolle a primeira semana de cada decembro a Festa do Viño Espumoso D.O. Rías Baixas. O obxectivo é fomentar o produto local e os viños espumosos aproveitando a campaña do Nadal. Tamén en decembro, o municipio acolle a Festa do Viño Novo de Arantei.
Festa da Anguía e Mostra da Caña do país en Valga
Aínda que non está dedicada ao viño, a festa de Valga entra por dereito dentro das celebracións enogastronómicas máis populares da provincia de Pontevedra. Combina a bebida espirituosa e augardente tradicional co pracer da degustación da anguía. A súa festa vén acompañada de actividades culturais e a noite do sábado adoitan preparar unha máxica queimada para todas as persoas asistentes.
Outras festas ao redor do viño na provincia de Pontevedra
Ademais destas catro festas de Interese Turístico na provincia, pódense localizar outras citas ao redor da enoloxía pontevedresa, como as festas do viño de Romai en Portas, a Mostra do viño de Vilaboa en maio, a do Viño Tinto do Salnés en Barrantes e Ribadumia a primeira semana de xuño, a de Barro a mediados de xuño, a do Viño Tinto Rías Baixas das Neves en xullo e as festas do viño do Pelete na Lama en setembro.
