O Grove, presente na Feira de Turismo Ornitolóxico 2018
O Grove estará presente na actual Feira Internacional de Turismo Ornitolóxico, que este ano se desenvolve desde o 23 ata o 25 de febreiro en Cáceres, Estremadura. O lugar elixido foi o Parque Nacional de Monfragüe.
A representación do municipio galego asistirá xunto con persoas da Reserva Ornitolóxica de SEO/BirdLife (Sociedade Española de Ornitoloxía). Ademais de participar nas diferentes actividades, dispoñerán de encontros e reunións con profesionais do sector turístico a nivel nacional e internacional como axentes de turismo de Reino Unido, Francia, Suecia, Noruega, Dinamarca, Alemaña, Suíza ou mesmo de China. Os encontros, duns 15 minutos, buscan vender ao Grove como un destino ornitolóxico atractivo dentro dun turismo que está á alza e cuxos turistas teñen un perfil de alto poder adquisitivo.
A feira de 2018, que alcanza a súa XIII Edición, é a máis importante de España e atópase entre as máis importantes de Europa. Ademais das diferentes casetas e exposicións, sucederanse durante todo o fin de semana actividades infantís, familiares, rutas guiadas e mesmo bolsas de contratación por algunha das empresas ou entidades participantes.
O Grove apostou nos últimos anos por esta actividade turística que por unha banda atrae a visitantes fora da época estival, fomentando o turismo "desestacionalizador", e por outra, permite apoiar a conservación de contornas naturais de gran valor como é o Complexo Intermareal Umia-O Grove.
Este complexo está protexido pola Rede Natura 2000 e goza da distinción de Zona de Especial Protección de Aves (ZEPA). A área esténdese máis aló do municipio. Case 3.000 hectáreas, das que o 62 % corresponden a área mariña e onde residen ata 53 especies protexidas, das que 40 delas son aves.
Trátase da feira máis importante de España e unha das máis importantes de Europa
O propio municipio conta co programa PIO (Proxecto de Investimento Ornitolóxico), co obxectivo de conservar a biodiversidade destes hábitats e impulsar a súa sustentabilidade. Proxecto que conta co respaldo da Fundación Biodiversidade e a Consellería de Medio Ambiente da Xunta de Galicia.
A páxina oficial ofrece un amplo abanico de opcións con respecto a este turismo. Desde os puntos recomendados para observar aves, así como material multimedia, un catálogo de especies, suxestións para o aloxamento e un portal de noticias onde manterse informado das diferentes actividades, como saídas grupais.
Ademais do complexo intermareal, Rías Baixas conta con outros espazos protexidos ZEPA dignos para amantes da ornitoloxía. Estes son o Parque Nacional das Illas Atlánticas e o Estuario do Miño.
