Plans con nenas e nenos nas Rías Baixas agora que acaba o cole
As clases acábanse, a temperatura sobe e por diante vén un verán repleto de divertidos plans en familia nas Rías Baixas . Praias, festas, parques, sendeirismo, museos con amenas exposicións e orixinais coleccións,… A lista de actividades con nenas e nenos na provincia de Pontevedra é inabarcable. Suxerímosvos algunhas ideas para espremer a tempada estival.
PRAIAS DE AUGA SALGADA E DOCE . Un plan de éxito garantido é pasar o día nas praias das Rías Baixas. Ata 55 contan este ano con bandeira azul, 54 delas na costa, desde o estuario do río Miño na Guarda ata Vilagarcía de Arousa; e unha no interior, a da Calzada, en Ponte Caldelas Hai centos de magníficos areais nas tres rías (Vigo, Pontevedra e Arousa), e praias fluviais na Cañiza, A Estrada, A Lama, Arbo, As Neves, Campo Lameiro, Cerdedo-Cotobade, Covelo, Cuntis, Fornelos de Montes, Lalín, Meis, Mondariz, Mondariz-Balneario, Ponteareas, Pontevedra, Portas, Ribadumia, Sanxenxo, Tui, Valga e Vila de Cruces.
PARQUE NACIONAL ILLASATLÁNTICAS . Estas xoias naturais deben figurar en subliñado na axenda estival das Rías Baixas. As Illas Cíes compoñen un paraíso idílico, con dúas praias de bandeira azul (a formidable Rodas e Figueiras), e unha impresionante ruta ata o faro, entre outros atractivos. As Ons, cunha beleza salvaxe, están salpicadas de praias entre as súas rocas e cantís. Varias navieiras realizan o transporte regular a ambos os arquipélagos, pero lembrade que para viaxar a Cíes é necesaria unha autorización especial ante a limitación de visitas diarias, e convén realizar o trámite con tempo. Cortegada, en Vilagarcía de Arousa e co bosque de loureiros máis grande de Europa, é a outra illa do Parque Nacional na provincia de Pontevedra, e é posible visitala en excursións marítimas.
ÁREAS DE XOGO . A Finca de Briz ou Parque dos Sentidos en Marín é un espazo máxico con xogos nas súas sendas, zona multiaventura na cima e unha gran riqueza botánica. Salvaterra de Miño acolle o megaparque da Canuda, o máis grande das Rías Baixas, con fileiras de tobogáns e randeeiras, circuíto de educación viaria, estanques con patos e cisnes, áreas arborezades e outros espazos ata sumar 200.000 metros cadrados para o lecer.
A Aldea Grobit na Toxa (O Grove) homenaxea aos parentes afastados dos hobbits, seres fantásticos que segundo a lenda viven baixo terra pero de cando en vez soben á superficie. Casas, xogos e coloristas árbores aseguran a diversión neste recinto. Castrelos é o gran parque urbano de Vigo. Loce un parque infantil con tirolesa e modernos xogos para diferentes idades.
CASTELO DE SOUTOMAIOR . A fortaleza alberga agora un estupendo museo no que se explica de maneira amena a súa historia e avatares desde a construción no século XII, así como as vivencias dos seus personaxes máis ilustres como Pedro Madruga ou María Vinyals. Caixas máxicas, 3D, quebracabezas e pantallas interactivas farán que nenas e nenos aprendan e xoguen á vez.
MUSEO GALEGO DA MARIONETA (LALÍN) . A catedral do mundo dos monicreques en Galicia conta cunha excelente colección de pezas e un rico fondo documental relacionado con esta arte que non só encanta á cativada, senón tamén aos adultos. Está situado ademais no magnífico pazo de Liñares .
PARQUE DA NATUREZA DO RÍO BAROSA (BARRO) . As rocas polas que baixa a auga das fervenzas énchense no verán de familias que acoden a refrescarse e pasar o día neste belo enclave polo que pasa o Camiño Portugués a Santiago. O parque conta, xunto á fervenza, con catorce antigos muíños restaurados , ademais dunha zona recreativa.
PASEOS A PÉ OU EN BICICLETA . Costa e interior da provincia de Pontevedra contan con belas sendas para gozar da exuberante natureza autóctona, xa sexa cun paseo a pé ou en bicicleta. A modo de referencia propoñémosvos seguir as doce rutas distinguidas como sendeiros azuis no litoral.
FERVENZA DO TOXA (SILLEDA). A fervenza, cun salto de auga de máis de 30 metros de altura, é un auténtico espectáculo que pode admirarse aos seus pés ou desde o miradoiro situado na contorna. É recomendable seguir tamén para completar a xornada a ruta ata o mosteiro de San Lourenzo de Carboeiro, unha xoia do románico oxival galego e símbolo da comarca de Deza .
VIGOZOO . O zoo da maior cidade de Galicia experimentou un gran cambio nos últimos anos. O recinto municipal, –onde habitan tigres, leóns, osos pardos, linces europeos, aguias, bufos, cisnes, boas ou tartarugas, entre outras moitas especies–, oferta unha ampla programación durante o verán, con acampadas familiares, campamentos matinais e de fin de semana, e accións de voluntariado.
