Somos Historias abre pontes entre Rías Baixas e Córdoba
A presentación da campaña “Somos historias” en Córdoba cultivou un gran éxito mediático e en redes sociais, e abrirá ademais novas pontes para o sector turístico entre Andalucía e as Rías Baixas.
A delegación da Deputación de Pontevedra e Turismo Rías Baixas mantivo reunións e sesións de traballo con empresas operadoras turísticas, institucións e asociacións culturais para tecer alianzas e impulsar a promoción de grandes activos turísticos. Os principais serán a Vía da Prata -unha das cinco rutas xacobeas que cruzan a provincia de Pontevedra e que nace en Andalucía-, as illas Cíes, o castelo de Soutomaior e a Ruta do Viño Rías Baixas.
“Centos de persoas seguiron en directo a presentación nas redes sociais e recibimos unha gran cobertura mediática. Fixéronse eco do acto as delegacións de EFE e Europa Press e obtivemos un espazo moi relevante nos principais diarios e emisoras de radio e televisión local”, explicou no seu balance esta mañá a presidenta da Deputación de Pontevedra, Carmela Silva, quen debullou as liñas de traballo e os acordos para a proxección do destino Rías Baixas en Andalucía.
Os principais medios de comunicación fixéronse eco da presentación e centos de persoas seguiron en directo o acto a través de redes sociais
Así, acordouse co padroado de Turismo de Córdoba abrir vías de promoción conxunta da Vía da Prata con vistas ao Ano Santo de 2021, e manteranse conversas sobre o intercambio de experiencias na recepción de turistas internacionais e a xestión turística do patrimonio. “Estamos a traballar con axencias operadoras turísticas na xestión de reserva de grupos para visitar o castelo de Soutomaior desde Andalucía e no asesoramento para a xestión das visitas ás illas Cíes e a Ruta do Viño Rías Baixas”, explicou Carmela Silva.
A comitiva mantivo contactos co Concello de Córdoba, a Casa de Galicia, a Universidade de Córdoba, a Cámara de Comercio, a Asociación de Amizades do Camiño Mozárabe e outras asociacións sociais, culturais e turísticas da provincia. Así mesmo, a presidenta da Deputación subliñou tamén o encontro mantido co vicepresidente da Confederación Española de Axencias de Viaxes, no que se abordou a posibilidade de desenvolver nas rías Baixas un encontro con operadores turísticos de Galicia e do norte de Portugal. “Non pode haber lugar mellor para fomentar os intercambios entre Galicia e Portugal”, indicou, para apostilar: “en Córdoba abrimos liñas de traballo para explorar traballos conxuntos que permitirán traer á provincia de Pontevedra cada vez máis visitantes que buscan cultura, lecer e turismo sustentable”.