Un paseo pola máxica Rapa das Bestas e o sentir do pobo de Sabucedo
Saben que é a aloita?, e a besta do santo?, o curro? Son algúns dos termos do dicionario abreviado de Rapa das Bestas de Sabucedo, este ano do 7 ao 10 de xullo recollidos na completa mostra sobre esta Festa de Interese Turístico Internacional exhibida ata hoxe ao aire libre na avenida de Santa María (Pontevedra), fronte á sede de Turismo Rías Baixas.
A exposición, baixo o nome "O sentir dun pobo: Sabucedo e a Rapa das Bestas", combina información con belas imaxes da rapa, de Sabucedo e comarca, e abarca todos os aspectos centrais da festa, a súa tradición de máis de cinco séculos e a contorna na que se celebra.
Os textos explican de forma amena a esencia do combate entre as e os aloitadores e os animais. "As bestas xa están no curro, nerviosas porque chegou o momento inevitable. Pero non se deixan vencer, seguen desafiando ao ser humano. As aloitadoras e aloitadores esperan, tamén con nerviosismo pero valentes. É só un instante, están na capela, esperando… Outro ano máis loitarán ata a extenuación", relata sobre o momento previo á ancestral loita para cortar as crinas, que acoden a retratar cada ano fotoperiodistas de todo o mundo.
"As bestas desafían ao ser humano. As aloitadoras e aloitadores esperan, tamén con nerviosismo pero valentes. Outro ano máis loitarán ata a extenuación", evoca a mostra
A parroquia, a historia de rapa, a festa, as rutas naturais e patrimoniais, a iniciativa "Sabucedo Puxa" –que ten como obxectivo impulsar o emprego na zona a través do turismo–, e as visitas a lugares de interese na contorna son algúns dos apartados da exposición, que propón visitar entre outros lugares O Pazo de Oca, O Parque de Arte Rupestre de Campo Lameiro , O Mosteiro de Aciveiro ou o Observatorio Astronómico de Forcarei .
Papel da muller
A muller gañou presenza na festa nos últimos anos e son varias as aloitadoras que participan no corpo a corpo coas bestas. As avoas de Sabucedo lembran como na Guerra Civil foron elas as que substituíron aos homes adultos e rapaban ás bestas con axuda dos nenos e maiores.
Reproducímosvos os termos do dicionario abreviado. Na exposición "O sentir dun pobo" atoparedes moito máis.
Aloita: modo regrado e ritual de dominar no Curro a unha besta con só os brazos para cortarlle as crinas.
Besta do santo: pertencente ao santo (san Lourenzo ); é dicir, a igrexa.
Bicho: cría nova, macho ou femia, ata que cumpre máis ou menos un ano.
Curro: recinto destinado especificamente a rapa das bestas. Está o curro vello (1779) e o novo (1997).
Fachada (besta): besta cun sinal branco na cabeza que non ocupa todo o seu espazo frontal.
Grea: cada unha das diversas mandas de bestas que hai no monte.
Griñon: cabalo xefe dunha determinada grea. Deben sempre ser do "santo".
Pau de moca: vara procedente dun carballo, que ten nun extremo un pequeno vulto a modo de verruga.
