5 citas cinematográficas imprescindibles en Rías Baixas
Ademais de ser un gran estudio cinematográfico, Rías Baixas tamén acolle varios festivais de cinema con proxección internacional en varios municipios de la provincia de Pontevedra:
Festival Internacional Play-Doc, Tui
A primeira cita cinematográfica para as próximas semanas en Rías Baixas ábreo o festival Internacional Play-Doc en Tui. Do 26 de abril ata o 1 de maio poderemos asistir a este evento que se converteu no referente do cinema documental da provincia.
O certame recibiu máis de 800 películas de ata 53 países para a convocatoria de 2018. Na sección competitiva desta XIV edición contarase cos filmes de The Waldheim Waltz de Ruth Beckermann, Going South de Dominic Gagnon, Lamaland de Pablo Sigg, Terra Franca de Leonor Teles e Les Unwanted de Europa de Fabrizio Ferraro. As persoas asistentes poderán gozar ademais das proxeccións, de diferentes mesas redondas e talleres aos que se poderán inscribir.
Primavera de Cinema, Vigo
Unha semana despois chega a VII edición de Primavera de Cine da cidade olívica. Serán os días do 8 ao 13 de maio. En total 33 curtametraxes participarán na sección oficial nun festival centrado principalmente nas producións galegas e portuguesas, e cuxo país convidado será Brasil. A sección oficial combinará curtametraxes, longametraxes, animacións e videoclips. Durante a semana realízanse actividades alternativas como proxeccións ao aire libre ou a master class do director vigués Álvaro Gago. Ademais de asistir ás proxeccións, as persoas afeccionadas teñen a posibilidade de participar como voluntarias no evento.
Festival de cine de Cans, O Porriño
O festival por excelencia de Rías Baixas é unha cita imprescindible no panorama cinematográfico galego. O seu XV edición está programada para os días do 23 ao 26 de maio. Este ano contará con participación estranxeira de Brasil e Portugal do mesmo xeito que Primavera de Cine, e doutros países como Italia e Líbano.
Entre algunha das actividades preparadas está a actuación de Jairo Zavala Depedro, ademais de coloquios, un showcooking por Lucía Freitas e a homenaxe Premio Pedigree 2018 a Chelo Loureiro. Outra actividade é a Can Parade, na que calquera artista está convidado a realizar novas propostas e intervencións sobre a silueta do referente iconográfico do festival, o Can de Cans .
Festival Internacional de Curtametraxes, Bueu
O FIC BUEU do municipio do Morrazo aínda non lanzou o seu programa de 2018 pero xa temos os días nos que se desenvolverá. Do 7 ao 15 de setembro será cando se poida gozar destes filmes no que destacará a presenza internacional tanto nos traballos expostos como no xurado que entregará as Ánforas de Ouro e Prata. Á espera de nomear os traballos elixidos, este ano bateron o récord de participación con máis de 2.200 cintas recibidas. A súa misión, mostrar o mellor do panorama internacional nos últimos dous anos e apoiar os traballos galegos.
Novos Cinemas, Pontevedra
Celebrada en plena época estival en 2017, a terceira edición do cinema de Pontevedra cambiou de datas para desenvolverse entre o 11 e o 16 de decembro. A espera dunha programación final, o Festival internacional de Cinema de Pontevedra é unha aposta para directoras e directores emerxentes a nivel internacional ademais de apoiar a creadores galegos.
Queda pendente a programación duns cuantos máis festivais de cinema. Entre eles, o de Curtas Armadiña de Poio que a tempada pasada tivo lugar en novembro, e a Semana de Cine Submarino realizada o mesmo mes na cidade de Vigo alcanzando a súa XXVII edición.
