Percorre As Rías Baixas na moto de Alicia Sornosa
Cun percorrido circular que arrinca hoxe en Vigo co que visitará emblemáticos espazos turísticos como o Castro de Santa Trega, o castelo de Soutomaior, A Lanzada ou Cabo Home, a blogueira e motorista Alicia Sornosa gozará ata o mércores dunha espectacular ruta en moto pola provincia de Pontevedra. Tras unha exitosa experiencia o ano pasado que a levou a descubrir en catro rutas a costa atlántica de punta a punta , a primeira muller de fala hispana en dar a volta ao mundo en moto regresa para vivir unha experiencia que axuntará viaxe, cultura, paisaxe e gastronomía.
Tres días en moto pola costa e o interior da provincia de Pontevedra
A cidade olívica, a maior urbe de Galicia e que conta cunha oferta cultural, hostaleira, paisaxística e cultural ideal para toda a familia, é o punto de partida dunha ruta que a levará na súa primeira xornada, entre outros, ao Castro de Santa Trega, un poboado castrexo-romano datado entre os séculos IV a. C. e I d. C., recoñecido por ser un dos maiores das terras galegas, con petróglifos de 2.000 anos de antigüidade, e por ofrecer unhas espectaculares vistas da fronteira natural entre Galicia e Portugal que debuxa o río Miño.
O interior da provincia de Pontevedra ten moito que ofrecer, por iso no seu segundo día de viaxe Alicia Sornosa visitará os viñedos do Condado, boa mostra da calidade dunha Denominación de Orixe Rías Baixas, que traspasa fronteiras e que anualmente bate récords de vendas; os espectaculares xardíns do Pazo de Oca na Estrada, coñecidos como “o Versalles galego”; e o castelo de Soutomaior, unha incrible manifestación do rico patrimonio fortificado da provincia con belos xardíns no que ademais se acaba de reabrir ao público o seu novo museo, con recursos interactivos, xogos e paneis informativos cos que descubrir a historia de forma entretida.
O último día de viaxe en moto polas Rías Baixas levará a Alicia Sornosa á comarca costeira do Salnés, famosa polas súas adegas, as súas belas praias e recursos patrimoniais como a Torre da Lanzada, o único que sobrevive dunha antiga fortaleza erixida sobre os restos dun faro fenicio ou romano no século X para defender a ría de Arousa. Tras unha breve parada en Pontevedra, na capital da provincia, cun centro histórico polo que ruar e gozar de gastronomía de calidade, a blogueira trasladarase á península do Morrazo para deleitarse coa espectacular panorámica da ría de Vigo desde O Facho e o internacionalmente recoñecido paisaxe das Illas Atlánticas desde Cabo Home, e volver de novo a Vigo.
Un lugar ideal para as dúas rodas
As Rías Baixas son unha contorna única para as dúas rodas. O gran número de núcleos pola dispersión poboacional ten debuxado na xeografía galega un mapa de estradas locais e comarcais e vías secundarias con suaves pendentes que xera un espazo único para descubrir o territorio en vehículos de dúas rodas. Ademais a provincia de Pontevedra conta co aliciente de esconder lugares recónditos de impresionante beleza e riqueza e unha proposta gastronómica singular e recoñecida que a fan aínda máis atractiva para este tipo de turismo.
Alicia Sornosa é unha xornalista e blogueira española que mostra as súas experiencias persoais polo mundo mentres viaxa sobre dúas rodas nas que, segundo as súas propias palabras, “o mellor da viaxe é coñecer outras culturas, a súa gastronomía e sobre todo… a súa xente!”. Recoñecida como a primeira muller de fala hispana en dar a volta ao globo na súa moto “Descubierta”, bautizada así en homenaxe ao barco da Expedición Malaspina do século XVIII, conta cun gran número de seguidoras e seguidores en redes sociais e é asidua colaboradora da guía Repsol.
