Dúas festas gastronómicas para descubrir Ponte Caldelas e Vila de Cruces
Festa da Troita en Ponte Caldelas
A Festa da Troita é das celebracións gastronómicas máis antigas da provincia de Pontevedra. Remóntase nada menos que a 1967 alcanzando neste ano o seu LII edición. O que foi un evento organizado por uns amigos converteuse na exaltación dun dos seus mellores pratos con dous días de celebración.
Os actos comezarán o sábado temperán a partir das 8:30 da mañá co Concurso de Pesca Deportiva Senior e Veterano. A tarde virá acompañada dun certame coral ademais dos postos habituais de degustación gastronómica. Xa o domingo, celebrarase a segunda parte do Concurso de Pesca, Feminino, Xuvenil e Infantil e continuarán as actividades gastronómicas.
Que facer en Ponte Caldelas
Unha suxestión é dar un paseo polo río Verdugo. Se hai bo tempo, unha opción é darse un baño na piscina da praia fluvial da Calzada, a cal pode presumir de volver contar con bandeira Azul este verán.
Outra visita case obrigada é achegarse ata a área Arqueolóxica de Tourón. Esténdese por cinco estaciones rupestres no que se poden atopar petróglifos excepcionais. Mesmo existe unha aplicación que che indica onde están os petróglifos para localizalos máis facilmente.
E se o que apetece é facer algo de sendeirismo, entre os diferentes camiños do municipio unha ruta marcada é a PRG 109, a cal nos levará a enclaves de gran valor etnográfico como o Foxo do Lobo.
Para finalizar, outra suxestión é achegarse a algúns dos seus miradoiros como o da Castrelada. Os seus municipios veciños como Cerdedo-Cotobade, A Lama, Fornelos de Montes ou Pazos de Borbén tamén ofrecen espazos naturais singulares para desconectar e pasear.
No pobo mineiro de Fontao podemos coñecer o legado galego da II guerra mundial e a extracción de volframio
Festa do Galo de Curral en Vila de Cruces
A particularidade do galo de curral de Vila de Cruces é que é criado en liberdade, repercutindo directamente na calidade da súa carne. O domingo 27 de maio celebra o seu primeiro cuarto de século, case a metade que a Festa da Troita. Entre as actividades programadas para a festa destaca o pregón que realizará este ano o popular presentador Carlos Lozano ás 13 horas. Dúas horas antes, ás 11, haberá unha exposición de tractores clásicos. E xa pola tarde terá lugar o Festival de Bandas de Galicia a partir das 17:30 horas.
Que facer en Vila de Cruces
Vila de Cruces forma parte dos belos municipios do interior de Pontevedra. No norte está bañado polo río Umia e no leste atopamos zonas forestais de gran relevancia cos Sobreirais do Arnego protexidos pola Rede Natura 2000.
Unha visita destacada é o antigo mosteiro de Salvador de Camanzo de mil anos de historia. e entre o legado etnográfico atopamos o peculiar hórreo da Casa da Brea. Do mesmo xeito que en Ponte Caldelas, tamén existen excelentes miradoiros, como o de Monte Faro. Pero se o que buscamos é unha visita única e peculiar, a mellor opción é achegarse ao pobo mineiro de Fontao para coñecer o legado galego da II guerra mundial coa extracción de volframio.
