Pasado e presente danzan en Aldán
Ancestrais, tradicionais e singulares, as Danzas de San Sebastián de Aldán regresan a esta parroquia de Cangas cada mes de xaneiro. O día 20 a localidade celebra as festas na honra do santo nunha xornada na que este colorido baile acapara todas as miradas.
Declarada Festa de Interese Turístico de Galicia, a inexistencia de fontes documentais específicas impide datar con exactitude a orixe desta danza. Non obstante, tense constancia de que esta tradición se remonta a mediados do século XVII.
Damas e galáns bailan no atrio da igrexa de Aldán Na actualidade este baile supón un espectáculo que se inicia no adro da igrexa de San Cibrán. Nesa contorna un total de dez galáns, cinco damas e un guía agardan a saída da procesión. Tras a pertinente reverencia ao santo, o grupo encabeza a comitiva coa particularidade de que as bailarinas e os bailaríns nunca lle dan as costas. Despois prodúcese a contradanza.
O ritual inclúe a inclinación das persoas que danzan ante a imaxe, tres veces cando se achegan e outras tres cando volven á súa posición inicial. É o guía o encargado de dirixir en todo momento os movementos do conxunto, que se producen ao son da gaita, o tamboril e as castañolas.
Obra de arte floral
A indumentaria destaca pola súa singularidade. Panos de cores, mandil negro, vestido branco e mantón de Manila conforman a vestimenta delas, mentres que eles bailan ataviados con zapatos e traxe de cor negra realzado con chapeu de feltro. Destaca o chapeu confeccionado con flores e cintas de cores que locen as damas.
Pero esta localidade non é a única en marcar o ritmo, pois no concello de Cangas (na comarca do Morrazo) sobresaen tamén danzas coma as que se interpretan nas parroquias do Hío e de Darbo na honra de San Roque e de Santa María, respectivamente, que se integran nas Danzas Ancestrais de Cangas.
