Berce do mestre de "gaiteiros"
A Festa do Gaiteiro de Soutelo de Montes rende homenaxe a un dos gaiteiros máis ilustres, Avelino Cachafeiro, quen gravou a célebre Muiñeira de Chantada. O evento congrega numerosas bandas de música tradicional galega que realizan actuacións musicais con bailes tradicionais.
A parroquia de Soutelo de Montes aínda lembra hoxe a Avelino Cachafeiro, proclamado no ano 1924 como o mellor gaiteiro de Galicia.
Esta localidade do concello de Forcarei honra o seu afamado músico desde 1979 coa Festa do Gaiteiro, declarada de Interese Turístico Galego en 2010. Este festexo reúne centos de músicos cada ano e atrae miles de persoas de toda a comunidade e do país veciño, Portugal.
Avelino gravou en 1928 unha peza transcendental no repertorio tradicional, a Muiñeira de Chantada, e levouna polo mundo cos seus irmáns, tamén músicos. A orixe da festa remóntase aos encontros que organizaba co alumnado do grupo de gaitas da comarca de Tabeirós-Terra de Montes. Actualmente, a celebración reúne na praza dos Gaiteiros centos de músicos chegados de toda Galicia e dalgúns países estranxeiros. As gaitas, tambores e pandeiretas inundan a localidade de música e bailes tradicionais, todo un espectáculo sensorial para o oído e para a vista.
Pregón e ofrenda floral
A festa comeza co pregón e a ofrenda floral para honrar o recordo de Avelino Cachafeiro, o prodixioso autodidacta que aprendeu a tocar os instrumentos do seu avó e que, xunto aos seus irmáns, obtivo tal éxito que chegou a tocar en Sudamérica e nas Olimpíadas de Amberes. A figura de pregoeira ou pregoeiro é de grande importancia, xa que se selecciona tendo en conta a aquelas persoas que poñan en valor e contribúan a condecorar a memoria do que foi o mellor gaiteiro de Galicia.
A sesión vermú e a comida popular na carballeira do parque Venezuela son algúns dos actos festivos. Despois lévase a cabo unha ruada popular multitudinaria que congrega músicos e persoas afeccionadas. A festa conclúe cunha actuación de música e baile tradicional. Así, a Festa do Gaiteiro, convértese nunha cita indispensable en Soutelo de Montes para enxalzar a nosa cultura e a nosa tradición.
