A excelente curación do xamón da Cañiza
O Atlántico, o Miño e as illas Cíes. A boa comida e o bo albariño. Todo aquel que chega a Galicia sabe que esta comunidade costeira é famosa polos seus pratos mariñeiros e, en especial, polo marisco.
En Galicia gusta a variedade, e no interior pódese gozar de boa comida. Proba diso é a metade de século que xa cumpriu a famosa Feira do Xamón de A Cañiza. O segredo reside no bo facer, e está claro que unha cultura ligada a iso e o clima tamén axudan. Por unha banda, a boa crianza do porco, e por outra, a antiga tradición da matanza do animal, que ata hai ben pouco se realizaba en cada aldea, especialmente nas do interior. Un traballo que se completaba grazas ao microclima, que provía o xamón dunha envexable curación e garantía a súa conservación nas propias casas dos veciños.
Este proceso terminaba coa súa disposición no prato, e para iso un bo corte era e segue sendo esencial. Toda unha arte que reúne bos cortadores na feira.
Aínda que é un prato moi coñecido en España, cómpre mencionar que se trata da única festa galega dedicada a este manxar, e nunca mellor dito, pois antigamente o que criaba o porco vendíao para beneficio da familia e así poder subsistir o resto da tempada.
Declarada Festa de Interese Turístico de Galicia, é unha boa escusa para achegarse a A Cañiza e probar cada un dos pratos que se ofrecen durante a feira, coma o xamón curado ou asado, en cocido, en tortilla e en empanada. E todo o que o desexe pode acompañar a comida cun viño local do Condado do Tea, Denominación de Orixe Rías Baixas.
Para ver e percorrer
Despois de comer, unha boa idea é pasear polo Camiño da Raíña e por algún dos pazos que se atopan na zona, coma o pazo da Fraga, os pazos de Cuco-Ruxo, Ribeira e Salgado ou o de Barreiro.
Outra opción é achegarse ao santuario da Franqueira, a apenas 30 minutos en coche, e descubrir a antiga arte de refrixeración dos neveiros.
